Manila, Philippines – Hawak umano ni Philippine National Police (PNP) chief Archie Gamboa ang listahan ng mga gambling operator sa lahat ng rehiyon sa bansa.

Sa ngayon, ani Gamboa, na naibigay niya na umano ang listahan sa lahat ng regional police directors.

“We are going against them. Lahat ng illegal gambling from low to high [We are going against them… All of them, from low to high],” ani Gamboa.

Inatasan niya naman ang lahat ng Kapulisan na magkasa ng “aggressive” operations laban sa iligal na sugal.

“Yes, in the next few months, heads will roll if you don’t follow my instructions. If you don’t do aggressive operations and you don’t start relieving your chiefs of police, then I will not be convinced,” dagdag pa ni Gamboa.

Binantaan naman ni Gamboa na pananagutin ang mga police officer na mabibigong masawata ang iligal na sugal sa kanilang nasasakupan.

Naniniwala rin umano si Gamboa na mayroong ilang mga pulis na protektor ng mga operator ng iligal na sugal.

“Anyway, yun lang naman pakiusap ko, huminto na kayo eh [That is my only request. Please stop]. Otherwise, you will face the full force of the law,” banta ni Gamboa sa mga nagsusugal, maging sa mga operator.

Balak ding palakasin ni Gamboa ang Integrity Monitoring and Enforcement Group (IMEG) at ang Internal Affairs Service (IAS) para mahuli ang mga pulis na protektor ng mga gambling lord.

“We have to convince the people that we are serious on everything, that the PNP does not protect any illegal activities that other citizens do.” Remate News Team

The post Listahan ng gambling lords sa bansa, hawak ni Gamboa; Mga pulis na protektor, tutugisin appeared first on REMATE ONLINE.

Manila, Philippines – Hawak na ng Manila Police District (MPD) ang suspek na nangholdap at bumaril sa isang pares mami vendor sa Baseco Compound Port Area, Maynila kahapon ng madaling araw.

Napasugod naman si Manila Mayor Francisco ‘Isko Moreno’ Domagoso kasama si MPD P/BGen Bernabe Balba sa Baseco PCP nang malaman na nahuli ang suspek na si Rowell Brillantes.

Hindi naman naitago ang galit ng alkalde sa suspek nang makita at mahawakan ang baril na ginamit ng suspek sa biktimang si Samson Bautista, 41 anyos.

“Gusto mo bang hawakan baril mo? Eto oh..ipalo ko pa sa ulo mo yan eh” sambit pa ng alkalde habang kaharap na kinakausap ang suspek.

Hindi rin napigilan ng mga kapatid ng biktima ang kanilang galit sa suspek nang pagsusuntokin sa loob ng Baseco PCP na inawat na lamang ng mga pulis at ng alkalde na napayakap sa kaanak na humahagulgol sa sama ng loob sa sinapit ng biktima na naghahanap buhay lamang ng marangal.

Pinayuhan naman ng alkalde ang kapatid ng biktima na huwag magpapa-areglo sa suspek dahil ang katulad aniya nito ay walang puwang sa Maynila.

“Batugan ka! Naghahanap buhay yung tao tas hoholdapin mo kundi ka ring batugan, namenerwisyo ka pa. Ikaw ang sumisira sa imahe ng Baseco” galit pang sinabi ng alkalde sa suspek.

Ang biktima, ayon sa ulat ng Gat Andres Bonifacio Hospital sa alkalde ay nasa Intensive Care Unit (ICU) pa bagamat stable na ang kalagayan ay under observation pa dahil sa tinamong tama ng bala sa leeg.

Sinabi naman ng kapatid na lalaki ng biktima na bagamat naaresto na ang suspek ay magiging tunay na masaya lamang sila kapag makitang maayos na ang kalagayan ng kanilang kapatid na biktima na tinamaan sa spinal cord.

Matapos makaharap ng alkalde ang suspek ay tutungo naman ito sa ospital upang bisitahin at alamin ang kalagayan ng biktima. (Jocelyn Tabangcura-Domenden)

The post Suspek sa pagbaril sa mami vendor sa Baseco, huli na! appeared first on REMATE ONLINE.

Manila, Philippines – Magdadala ng pag-ulan at maulap na kalangitan ang hanging Amihan sa ilang bahagi ng bansa ngayong araw ng Huwebes, ayon sa PAGASA.

Iiral ang Amihan sa Cagayan Valley, Bicol Region, Eastern Visayas, Aurora, Quezon, Oriental Mindoro, Marinduque, Romblon, at Panay Island na makararanas ng bahagyang pag-ulan at maulap na panahon.

Maging ang Metro Manila at nalalabing bahagi ng bansa ay maaapektuhan ng Amihan na magdudulot ng panaka-nakang pag-ulan. Remate News Team/FGDC

The post Amihan, iiral sa bansa ngayong Huwebes, Feb. 20 appeared first on REMATE ONLINE.

Cavite – Sinalakay ng mga pulis ang dalawang spa sa Bacoor na umano’y nag-aalok at nagbibigay ng extra service, Huwebes ng madaling araw habang naaresto naman ang dalawang indibidwal na pawang cashier sa spa.

Ayon kay Police Lt. Col. Vicente Cabatingan, hepe ng Bacoor City Police, una nilang sinalakay ang spa na kapareho pa ng isang relihiyosong sekta sa may Tirona Highway, Barangay Mabolo III matapos makipagtransaksyon ang kanilang asset para makipagtalik.

Sa tala ng surveillance, nagkakahalaga ng P3,500 hanggang P4,500 ang all-the-way extra service.

Samantala, itinanggi naman ng tatlong babaeng naabutan ang sinasabing serbisyo na alok nila.

Nasagip din ang dalawang babae sa spa na ni-raid sa Barangay Bayanan kung saan pinaliliguan umano ang mga kustomer bago ang masahe at may extra service na nagkakahalaga umano ng P1,500.

Sinabi ni Police Col. Marlon Santos, provincial director ng Cavite na ipasasara na ang mga establisimyento lalo na at napag-alaman itong walang permit.

Mahaharap sa kasong human trafficking ang dalawang nadakip. Remate News Team/FGDC

The post 2 spa na may extra service sa Cavite, sinalakay; 2 arestado appeared first on REMATE ONLINE.

Manila, Philippines – Bukas ang San Miguel Corporation (SMC) sa pag-aaral ng bagong disenyo sa Metro Rail Transit Line 7 (MRT7 Quezon Memorial station) matapos ipatigil ni Quezon City Mayor Joy Belmonte ang konstruksyon nito.

“For us, while the order is a setback, we will do everything we can to make sure we keep to the timetable, and at the same time take into account the Mayor’s concerns. This includes revisions to the design,” ani SMC president at COO Ramon Ang.

“The resolution of issues is really up to DOTr as main proponent, and the local government unit,” dagdag pa nito.

Sinabi naman ng DOTr na ipagpapatuloy ang underground construction habang nakikipag-koordina sa Quezon City LGU para sa above-ground works.

“We will coordinate with the LGU of Quezon City as soon as possible to discuss and clarify this matter,” pahayag ni DOTr spokesperson Goddes Libiran.

“We are certain that at the end of the day, we will be able to strike a balance and obtain a win-win situation,” paliwanag pa nito.  Remate News Team/FGDC

The post SMC bukas sa redesigning ng MRT7 appeared first on REMATE ONLINE.

Manila, Philippines – Kalaboso ang isang lalaki sa ikinasang buy-bust operation ng northern police district drug enforcement unit sa Munoz public market sa Quezon City, ayon sa mga awtoridad.

Kinilala ang 22-anyos na suspek na si John Carlo Niedo

Nasabat sa suspek ang 5 bloke ng pinatuyong dahon ng marijuana na tinatayang nasa limang kilo at mayroong market value na P600,000.

Ayon kay Police Capt. Ramon Aquiatan Jr.ng NPD drug enforcement unit, nagsagawa sila ng follow up-operation kasunod ng pagkakadakip ng dalawang suspek na nahulihan ng isa’t kalahating kilo ng marijuana nppng Feb. 16 sa Bagong Barrio, Caloocan City.

Mahaharap sa kasong paglabag sa Comprehensive Dangerous Drugs Act ang suspek. Remate News Team/FGDC

The post Kelot timbpg sa P600K marijuana sa Kyusi ops appeared first on REMATE ONLINE.

Manila, Philippines – “Trillanes is the true ‘Bikoy’”

Ito ang buweltang tugon ni Senador Bong Go sa naging akusasyon ni dating senador Antonio Trillanes IV kay Pangulong Rodrigo Roa Duterte at sa pagbu-bully sa kanya.

“Ang totoong Bikoy ay si Sonny Boy (Trillanes). ‘Yan ang totoong mayabang. Kahit saan ka pumunta, magliliparan tayong lahat dahil sa sobrang hangin mo. Alam ng tao ‘yun,” ayon kay Go sa isang panayam sa Bocaue, Bulacan, kung saan siya namahagi ng financial at relief assistance sa mahigit 700 indibiduwal na nawalan ng bahay dahil sa sunog.

Tinutukoy ni Go si “hooded man” na kilala sa pangalang Bikoy sa mga serye ng video na kumalat sa online na nagdadawit kay Pangulong Duterte at sa kanyang pamilya sa drug syndicates.

Isang ex-convict na nagngangalang Peter Joemel Advincula ang nagbunyag sa kanyang sarili na siya si alyas Bikoy.

“Sino bang magpi-finance kay Bikoy? Kaya ba niyang magbayad ng mga ginawang video na paninira eh milyon milyon ang halaga nun? Wala nang iba kung sino. Paninira kasi itong si totoong Bikoy na si Sonny Boy. Siya ang gumagawa ng kalokohan. Siya ang gumagawa ng black propaganda,” ayon kay Go.

Kaugnay sa mga controversial videos, naghain naman ng kasong sedition ang mga government prosecutors laban kay Trillanes at sa 10 iba pa.

At nang makapag-piyansa si Trillanes para sa kasong nabanggit nito lamang Martes, Pebrero 18, ay sinabi ng dating senador na “Si Duterte, sila Bong Go, ‘yang mga ‘yan, pasiga-siga ‘yang mga ‘yan ngayon. ‘Pag wala na sa puwesto si Duterte, mark my words, hindi ‘yan haharap sa ganito.”

Ani Go, may karapatan si Trillanes na magpiyansa subalit kailangan na panagutan ng dating senador ang para kay Go ay “kalokohan” ni Trillanes.

“Saan kukuha si Advincula ng pambayad, professional video lalabas? Sisirain mo, pinahubad mo ako ng dalawang beses. Di ba pinahubad mo ako para kulayan mo kami ng itim para ikaw ang pumuti?”

At para naman pasinungalingan na mayroon siyang tattoo na nagpapahiwatig na miyembro siya ng isang drug syndicate ay walang takot at hiya na dalawang ulit na naghubad si Go sa press briefings.

Sinabi rin ni Go na handa niyang harapin ang anumang kaso na ihahain lavan sa kanya kapag nagtapos na ang termino ni Pangulong Duterte.

“Hindi ako tulad sa ‘yo. Pagdating ng panahon, pagbaba ng amo ko, hindi ako magtatago, pero papa-injection kami ni Pangulo ng anti-rabies. Baka makagat kami ng asong ulol. Ikaw ang mayabang. Si Bong Go lang ako. Hindi ako si Trillanes. Tandaan mo ‘yan,” ang diing pahayag ni Go na ang tinutukoy ay si Trillanes. Kris Jose

The post Si Trillanes ang totoong Bikoy – Go appeared first on REMATE ONLINE.

Manila, Philippines – Tinambangan ang suspendidong hepe ng legal division ng Bureau of Corrections (BuCor) na iniuugnay sa iregularidad ng good conduct time allowance (GCTA) malapit sa New Bilibid Prison (NBP) sa Muntinlupa City, Miyerkoles.

Kinilala ang biktimang abogado na si Fredric Anthony Santos na lulan ng kanyang itim na Toyota Hilux pickup na binaril sa kahabaan ng Katihan Road sa Barangay Poblacion bandang 1:50 p.m.

Ayon sa mga imbestigador, nakita ang nasa apat na tama ng bala ng baril sa kanyang ulo at dalawa sa kanyang katawan.

Sabi ng mga pulis, susunduin ni Santos ang kanyang anak sa paaralan.Sa ngayon ay iniimbestigahan na ang motibo ng pamamaril at tinutugis na ang mga suspek. Remate News Team/FGDC

The post Opisyal ng BuCor na konektado sa GCTA, patay sa pananambang appeared first on REMATE ONLINE.

Samar – Patay ang isang rider sa pamamaril ng hindi pa nakikilalang suspek sa Barangay Salug, Guiuan, Eastern Samar, Martes ng hapon

Kinilala ng Guiuan Police ang biktima na si Leonel Antofina, 19-anyos.

Nagmamaneho ng motorsiklo ang biktima kasama ang pinsan nitong menor de edad nang maganap ang krimen.

Binabaybay ng dalawa ang daan patungong Poblacion ng Guiuan at pagdating sa nasabing lugar, may narinig na putok ng baril ang pinsan ng biktima.

Tumambad ang duguang likod na bahagi ng ulo ng biktima.

Samantala, agad namang nakatakas ang salarin na sakay din ng motorsiklo.

Habang narekober ng mga pulis ang isang basyo ng bala ng caliber .45 na baril sa krimen at mabilisan ding ikinasa ang hot pursuit operation para sa ikadadakip ng suspek. Remate News Team/FGDC

The post Rider sa E. Samar, patay sa pamamaril appeared first on REMATE ONLINE.

Manila, Philippines – Inanunsyo na ng Department of Education (DepEd) na pwede nang ibalik ang mga aktibidad sa paaralan na nasuspende dahil sa coronavirus disease 2019 (COVID-19) outbreak sa darating na Lunes, February 24.

Kalakip nito ang mga aktibidad na pangnasyunal, rehiyonal, at mapaloob man ng paaralan.

Kasabay nito ay inatasan din ang mga paaralan na igugol ang weekends sa ‘school-wide general cleaning’ at ‘intensified disinfection efforts’ para manatiling ligtas laban sa naturang virus.

Iginiit din ng DepEd na ang lahat ng school personnel at estudyante na galing sa mga bansang may kumpirmadong kaso ng COVID-19 ay dapat sumailalim sa self-quarantine sa loob ng 14 araw. Remate News Team/FGDC

The post Mga aktibidad sa paaralan na nakansela, ibabalik na simula Feb. 24 – DepEd appeared first on REMATE ONLINE.

US – Pumanaw na ang computer scientist at user interface guru na si Larry Tesler sa edad na 74, ayon sa ulat.

Si Tesler ang nasa likod ng konsepto ng “cut-copy-paste” noong siya ay nasa Xerox Palo Alto Research Center pa noong 1970s.

Nagtapos si Tesler sa Stanford University na may degree sa Mathematics taong 1965.

Naging bahagi rin si Tesler ng Apple noong 1980 kung saan nadebelop din ang Newton MessagePad at Lisa,  precursor sa Macintosh at isa sa unang personal computers na may graphical user interface.

Samantala, hindi naman inihayag ang naging dahilan ng kanyang pagkamatay. Remate News Team/FGDC

The post Cut, copy, paste: Larry Tesler, pumanaw na appeared first on REMATE ONLINE.

Manila, Philippines – Arestado ang dalawang babae sa ikinasang buy-bust operation sa Barangay Payatas B, Quezon City, Miyerkoles ng gabi.

Sa ulat ni Police Maj. Sandie Caparroso ng Quezon City Police District Station 6, pawang mga walang trabaho ang mga suspek na nakatira sa nasabing barangay.

Nakipagtransaksyon umano ang poseur buyer ng P200 halaga ng droga kung saan nasamsam ang limang sachet ng hinihinalang shabu.

Mahaharap sa kasong paglabag sa Comprehensive Dangerous Drugs Act ang mga suspek. Remate News Team/FGDC

The post 2 bebot timbog sa Kyusi buy-bust appeared first on REMATE ONLINE.

Manila Philippines – Hindi magdadalawang-isip si Pangulong Rodrigo Roa Duterte na ipakain sa mga taga-Bureau of Immigration ang perang nakukulimbat ng mga ito dahil sa kanilang “pastillas” modus operandi.

Ang Pastillas scheme ay nagsisilbing suhol para sa taga- BI na nag-aayos ng pagpasok ng mga Chinese nationals sa bansa.

“Kung totoo man ito, maniwala kayo sa akin, ‘yung pastillas na nirorolyo, ipapakain sa inyo ‘yan ng Pangulo, pero ang palaman pera,” ayon kay Go.

Ani Go, kaya nga dinagdagan ng Pangulo ang sahod ng mga immigration officials ay upang hindi na maisip ng mga ito na mangurakot o masangkot sa korapsyon.

“Noong 2016, nawala ang inyong express lane extra pay. Kami ang tumulong sa inyo para mabigyan kayo ng augmentation pay, para mawala ang korapsyon. Gusto ni Pangulo madagdagan ang sahod niyo para di kayo mag-corrupt,” aniya pa rin.

Noong isang linggo lamang aniya ay may pinakain si Pangulong Duterte na P300.00 na nilunok naman ng taong iyon.

Sa ulat, kung kukuwentahinang ‘pastillas’ modus sa loob ng Bureau of Immigration ay aabot ito P1 bilyon.

Sa pagpapatuloy kasi ng imbestigasyon sa Senado tungkol sa mga krimen na may kinalaman sa Philippine offshore gaming operators (POGOs) partikular ang prostitusyon at trafficking, ay lumalabas na umaabot sa P10,000 service fee ang kinokolekta sa bawat Chinese nationals na pumapasok sa bansa.

Ang mga bayad na ito ay tinawag na ‘pastillas’ noong una, dahil nirorolyo ito sa papel na parang pastillas ngunit kalaunan ay tinawag na rin itong ‘bonus,’ at inilalagay na sa mga envelope.

Ipinakita rin ang mga viber messages ng mga immigration officer, na tila nagsisilbing guest list dahil dito nakalista ang mga pangalan ng mga Tsino at ang flight details ng mga ito.

Pagdating sa bansa ng mga inaasahang Tsino, ay sa hiwalay na kwarto ipoproseso ang dokumento at passport ng mga ito.

Kung susumahin sa dalawang libong Chinese na pumapasok sa bansa kada araw, ay aabot sa P1 bilyong ang nakukulimbat mula sa modus na ito.

Bukod sa perang padulas, binibigyan rin ng mga Chinese company ng packed meals ang mga immigration officer.

Tinanggi naman ng mga immigration officer na dumalo sa pagdinig, na alam nila ang tungkol sa naturang kalokohan.

Samantala, ipinakita rin ang isang video ng isang immigration officer na inieskortan ang mga Chinese nationals sa loob ng tanggapan ng BI. Kris Jose

The post PDU30, ipapakain sa mga sangkot sa scheme ang nirolyong pastillas na may palamang pera – Go appeared first on REMATE ONLINE.

US – Mamamahinga muna ng apat hanggang anim na linggo ang point guard ng Chicago Bulls na si Kris Dunn matapos sumailalim sa MRI exam sa kanyang kanang tuhod.

Maaalalang noong January 31, nagtamo siya ng injury at dumaan muli sa pagsusuri noong Biyernes.

Sa datos ni Dunn, mayroon siyang kabuuang 7.3 puntos, 3.6 rebounds, 3.4 assists at 2.0 steals sa 51 laro.  Remate News Team/FGDC

The post Kris Dunn ng Bulls, magpapahinga ng 4 hanggang 6 linggo appeared first on REMATE ONLINE.

Manila, Philippines – Kulong ang isang lalaki at isang babae na umano’y nasa drugs watchlist sa ikinasang buy-bust operation sa Barangay San Roque, Navotas City, Miyerkoles ng gabi.

Tinatayang aabot sa P29,000 ang halaga ng apat na gramong hinihinalang shabu na nasabat ng tauhan ng Navotas Police mula sa mga suspek.

Mahaharap sa kasong paglabag sa Comprehensive Dangerous Drugs Act ang isasampa laban sa dalawa. Remate News Team/FGDC

The post 2 kulong sa buy-bust ops sa Navotas appeared first on REMATE ONLINE.

Manila, Philippines – Kinumpirma ni Presidential spokesperson Salvador Panelo na hindi na nga muna ipinalabas ng Department of Budget and Management (DBM) ang P84 bilyong congressional realignment.

Ani Sec. Panelo, nakausap niya si DBM Sec. Wendel Avisado at sinabi nito sa kanya na ang P84 bilyon ay hindi aniya agad na ipalalabas subalit depende aniya sa pangangailangan at paggagamitan ng ipalalabas na pondo.

“In other words, there will a process,” ayon kay Sec. Panelo.

Binigyang diin ni Sec. Panelo na walang kamay ang Malakanyang sa naging hakbang na ito ng DBM.

Sa kabilang dako, naniniwala naman si Sec. Panelo na walang nakitang iregularidad ang DBM kaya’t pinigilan muna nito ang pagpapalabas ng P84 congressional realignment.

Ang paliwanag  ni Sec. Panelo ay kung may  nakita aniyang iregularidad ang DBM ay hindi na sana ipinasok ang nasabing halaga sa national budget.

‘Kaya lang ang sinasabi niya, kung kailangan iyon.. there is a need for that then we have to include that in the budget, but they have to pass certain processes,” ani Sec. Panelo.

Wala namang nabanggit kung kailan ipalalabas ng DBM ang nasabing budget dahil ayon kay Sec. Panelo ay depende aniya iyon sa proseso. Iyon nga lamang ay hindi niya alam kung anong proseso ang pagdaraanan para maipabas ang nabanggit na budget.

“There is a protocol for that. They have to pass thru that,” ang pahayag ni Sec. Panelo.

Sa ulat, sinasabing hindi umano hinarang ng Malakanyang at ng DBM ang pagpapalabas ng P84 bilyong congressional realignment.

Ayon kay Senador Panfilo Lacson na ilang mambabatas ang nagtangkang ilipat ang P80 bilyong pondo ng Build, Build, Build  flagship program patungo sa mga pet projects ng kanilang mga distrito sa ilalim ng 2020 national budget.

Para kay Lacson, ang nasabing gawain ay “unmitigated gall” kasabay ng pagpuri kay Pangulong Duterte at sa DBM sa kanilang ginawang hakbang.

Batay sa nakarating na impormasyon sa tanggapan ni Lacson, sa halip na i-veto ni Duterte ang nasabing line items na magde-delay sa pag-apruba ng national budget  ay nagdesisyon na lang ang DBM na maglabas ng circular na tinawag na “for later release” na kahalintulad na rin ng pag-veto. Kris Jose

The post P84B congressional realignment, di muna ipalalabas ng DBM: Panelo appeared first on REMATE ONLINE.

La Union – Patay ang isang dating kapitan ng barangay matapos na lusubin sa bahay at pagbabarilin ng apat na hindi nakilalang kalalakihan sa Brgy. Rissing, Bangar.

Kinilala ng Bangar Police ang biktima na si Roger Sibayan, 39, dating kapitan ng Brgy. Rissing, Luna, ng naturang lalawigan.

Base sa imbestigasyon, lumusob umano ang mga suspek sa bahay nito sa bayan ng Bangar bandang 3:20 ng madaling araw.

Sa kuwento ni Gng. Josie Sibayan, ina ng biktima, nakita nilang magkakasambahay kung paano kinaladkad at pinagbabaril ng apat na suspek ang kanyang anak sa mismong harapan nila pero wala silang nagawa para labanan ang mga suspek na armado ng baril.

Sa ngayon ay hindi pa rin alam ng pulisya at pamilya ng dating kapitan kung ano ang tunay na motibo sa pamamaslang.

Nabatid na noong August 2016 ay naaresto si Roger habang nanunungkulan bilang kapitan sa Brgy. Rissing, Luna matapos na matuklasan ng mga pulis sa isinagawang search operation ang itinatago umano nitong shabu at bala ng baril sa loob ng kanyang bahay.

Sa mga panahon na iyan ay itinuturing ang biktima bilang No. 1 drug personality sa bayan ng Luna habang No. 8 naman sa buong lalawigan ng La Union. Rolando S. Gamoso

The post Dating kapitan kinaladkad, pinatay sa mismong harapan ng pamilya appeared first on REMATE ONLINE.

Manila, Philippines – Patuloy na makakaramdam ng pagbabago ang publiko sa serbisyo ng Philippine National Railways (PNR) dahil magagamit na ng publiko ang dalawang bagong tren mula pa sa Indonesia ngayong araw ng Huwebes, Pebrero 20.

Dumating ngayong buwan ang dalawang tren na binubuo ng bagong 8100 series ng Diesel Multiple Unit (DMU) train cars na may four-car formation at nagmula sa Indonesian rolling stock manufacturer na PT Industri Kereta Api (INKA).

(c) Kuha ni Jhun Mabanag

Ang pinakabagong adisyon ng tren ay bahagi ng 2018 train procurement ng PNR na may layuning baguhin at pagbutihin ang serbisyo ng rail network.

Kasunod ng 150 na oras ng validation test, isinagawa ang isang send-off ceremony upang pormal na paganahin ang bagong tren para sa komersyal na operasyon nito. Inaasahang magdadala ito ng 1,000 na pasahero kada biyahe at magsisilbi sa mga pasahero sa assigned route nito na Tutuban hanggang Alabang.

Tatakbo mula Tutuban sa Maynila ang metro line ng PNR hanggang Los Baños sa Laguna.

(c) Kuha ni Jhun Mabanag

Sa mensahe ni PNR General Manager Junn Magno, isang testimonya ang pagdating ng dalawang bagong tren mula Indonesia na patuloy ang pagpapabuti ng serbisyo ng rail network sa publiko.

Sinabi ba ni Magno na mayroong karagdagang security features ang bagong tren ng DMU kagaya ng obstacle door detector upang maiwasang maipit sa gitna ang mga pasahero at tropicalized airconditioning system na dinisenyo na akma sa klima ng bansa.

Mayroon ding polycarbonate glass windows ang tren upang tumulong sa pag-iwas sa mga pinsala, lalo na ang insidente ng pamamato sa riles ng PNR.

(c) Kuha ni Jhun Mabanag

“Hahabulin po natin na by end of 2020, we should have enough capacity to serve the southern and part of the northern corridor. Bubuksan na po natin ang Valenzuela lane para ma-offload din po natin ang EDSA. All of that is actually supporting the over-all strategy of our good [Transportation] Secretary to provide a comfortable life, lalo na sa mga kababayan nating mananakay,” pahayag ni Magno.

Noong nakaraang taon, dumating sa bansa ang unang batch ng DMU train sets na mayroong anim na railcars. Sinimulan ang operasyon nito noong Disyembre 16, 2019. Bumili ng kabuuang 37 railcars ang PNR at inaasahang dadating sa bansa sa pamamagitan ng mga batch.

Magkakaroon pa ng dalawang DMU train set, 3 locomotives at 15 passenger coaches at 2 shunter sa loob ng unang kalahti ng 2020.

Kapag gumana na ang mga train set na ito, target ng PNR na mapagsilbihan ang kabuuang 140,000 na mga pasahero kada araw – na doble sa kasalukuyang capacity ng 48,000 hanggang 60,000 kada araw.

Samantala, tinanggap naman ni Department of Transportation (DOTr) Secretary Arthur P. Tugade ang development sa PNR sa pagbibigay ng mas madaliang pagsasakay sa publiko.

“Kaya nga ang sinasabi nila, development comes in when the trains start rolling. Today, PNR is rolling because certainly, we are setting limits high enough for the people to hear and for the people to feel that there will be development that is geared to provide Filipinos a comfortable and convenient life,” pagpapahayag ni Tugade. Remate News Team|MM/Jhun Mabanag

The post 2 bagong tren ng PNR, magagamit na ng publiko appeared first on REMATE ONLINE.

Manila, Philippines – Tinanggap ng isang grupong pabor sa paggamit ng medical marijuana ang pag-abruba ng Dangerous Drugs Board (DDB) sa cannabidiol (CBD) para sa epilepsy.

Sinabi ni Philippine Cannabis Compassion Society spokesperson Donnabel Cunanan na mapapabuti ng CBD ang buhay ng mga taong may kakaibang uri ng epilepsy.

Mayroong Dravet Syndrome ang anak ni Cunanan. Mayroon din itong Global Development Delay, at Cerebral Palsy na nakakaranas ng 300 hanggang 400 na seizures kada araw.

“Doon namin na-realize na hindi tumatalab ‘yung binibigay sa kanya ng doctors,” aniya.

“Masaya ako bilang nanay kasi nga, finally, after seven years na ‘yung anak ko rin makakagamit siya ng medical marijuana kasi hindi biro ‘yung pinagdadaanan niya.”

Component ng cannabis ang CBD at napatunayang nakakapaggamot sa dalawang kakaibang uri ng epilepsy.

Hindi kagaya ng marijuana, na isang uri rin ng cannabis, walang component ang CBD na magreresulta sa pagiging “high” ng gumagamit nito. Subalit, nagkakahalaga ng P1.6 milyon kada taon ang CBD.

Sinumang may nais gumamit ng CBD ay dapat magkaroon ng kinakailangang permit mula sa Food and Drug Administration.

Nilinaw naman ni DDB Undersecretary Benjie Reyes na nananatiling iligal sa bansa ang paggamit ng medical marijuana at “compassionate use” lamang ang papayagan.

“Huwag natin siyang iko-confuse doon sa raw form, ‘yung dahon na hinihithit. I-extract mo lang ‘yung oil… We did not allow marijuana use. It remains to be illegal in the country for both recreational and medical use,” paliwanag niya. Remate News Team|MM

The post Pag-aprub ng DDB sa cannabidol, welcome sa pro-medical marijuana group appeared first on REMATE ONLINE.

Manila, Philippines – Inanunsyo ng Department of Education ngayong Huwebes, Pebrero 20, ang bagong schedule ng paparating na national events na makaraang naapektuhan ng precautionary measures dahil sa pag-iingat sa banta ng coronavirus diseases 2019 (COVID-19).

Sa isang abiso sa Twitter, sinabi ng DepEd na ipagpapatuloy sa Marso 2 hanggang 6 ang National Science and Technology Fair sa Quezon City.

Sa kabilang banda, gaganapin naman sa Iligan City, Isabela mula Marso 9 hanggang 13 ang National Festival of Talents.

Ang Tuguegarao naman ang magho-host ng National Schools Press Conference sa darating na Marso 9 hanggang 13.

Karaniwang isinasagawa ang mga naturang pagtitipon sa buwan ng Pebrero.

Nitong Miyerkules, inanunsyo ng DepEd na ipagpapatuloy na simula Pebrero 24 ang lahat ng national, regional at off-campus activities na sinuspinde dahil sa banta ng COVID-19.

Pinayagan rin ang suspensyon ng klase sa mga paaralan at lugar na may kumpirmadong kaso ng COVID-19.

Mayroon lamang tatlong kumpirmadong kaso ng COVID-19 sa bansa at pawang mga Chinese nationals ang mga ito na mayroong travel history sa China. Dalawa sa mga ito ang nakarekober na habang isa naman ang nasawi. Remate News Team|MM

The post Bagong iskedyul ng nat’l events sa Marso, inanunsyo ng DepEd appeared first on REMATE ONLINE.