NABIGTI sa lubid ng sariling duyan ang isang 10-buwang gulang na lalaki sa Quezon City.
Ayon sa imbestigador na si PO3 Marlon dela Vega, naitakbo pa sa Novaliches District Hospital ang biktima na si Frederick Ballebar pero hindi na naisalba pa.
Naganap ang insidente dakong 5 p.m. nitong nakaraang Huwebes sa loob ng bahay ng pamilya Ballebar sa Robina Rd., Bgy. Nagkaisang Nayon, Novaliches.
Sa imbestigasyon, iniwan ng kanyang ina na si Josie ang sanggol sa isa pa nitong anak na si Jennifer para magtrabaho bilang store helper sa kalapit na tindahan.
Pero biglang humahangos na dumating si Jennifer sa kanyang pinapasukang tindahan at ipinaalam na nabigti sa nylon na panali sa duyan ang kanyang kapatid.
Hindi naman malinaw kung paano nabigti ang naturang sanggol.
Lumagda naman sa isang waiver ang nanay ng biktima para hindi na imbestigahan pa ang kaso ng namatay na anak. ROBERT TICZON