MAHiGIT sa 100 bagong motorcycle unit ang nilamon ng apoy makaraang masunog ang isang tindahan ng motorsiklo sa Barangay Potrero, Malabon City, Martes ng gabi.
Ganap na alas-7:00 ng gabi nang masunog ang Minerva Motorcycle Trading Corporation na pag aari ng negosyanteng Chinese sa Araneta Ave. ng nasabing barangay.
Umabot sa ikalimang alarma ang nasabing sunog na naapula makalipas ang limang oras.
Bukod sa mga motorcycle unit nasunog din ang mga mahahalagang dokumento ng tindahan.
Base sa isinagawang imbestigasyon ng mga awtoridad pinaniniwalaang electrical faulty wiring ang pinagmulan ng sunog na agad na lumamon sa kisame ng building at kumalat sa display area kung saan nandoon ang mga motor.
Sabay-sabay na sumabog ang tangke ng mga motorsiklo nang madilaan ng apoy.
Wala namang nasaktan sa pangyayari dahil wala na ang mga empleyado ng kumpanya nang sumiklab ang sunog.