TATLO ang naaresto kabilang ang isang Chinese national sa isinagawang buy-bust operation ng Philippine National Police-Investigation and Detection Group (PNP-CIDG) kahapon ng madaling-araw sa Maynila.
Kinilala ang mga nahuling sina Shuiquiao Cai, alyas Wilson, ng Pasay City; Ali Makalanga Samsamin, alyas Alex, taga-Taguig City; at Nasrullah Budi Ulimpin, tubong Cotabato.
Ayon kay P/Supt. Arnold Ibay, officer-in-charge ng CIDG in the National Capital Region, alas-2:00 ng madaling-araw nang ikasa ang operasyon sa gasoline station sa Quirino Ave. malapit sa Osmeña Highway sa Paco, Maynila.
Nagsilbing poseur buyer ang isang miyembro ng CIDG at bibili ng isang kilo ng shabu na nagkakahalaga ng P800,000 sa mga suspek.
Una umanong lumapit si Alex sa poseur buyer na nasa isang itim na sasakyan na nakaparada sa gasolinahan bago lumipat sa isa pang sasakyan kung saan doon isasagawa ang transaksyon.
Sa puntong iniaabot ang epektos ay agad na inaresto ang suspek.
Nakumpiska ang apat na kilong shabu na may halagang P15-milyon sa mga suspek na matagal na umanong isinailalim sa survellaince.
Samantala, maglulunsad naman si Manila Mayor Joseph Estreada ng Anti-Drugs summits sa iba’t ibang lokasyon sa Maynila upang hikayatin ang lahat ng mamamayan, sektor, organisasyon, institusyon at mga barangay na makiisa sa kampanya laban sa droga.
Inaasahang magiging ka-partner ng Manila LGU sa Anti-Drugs summits ang Philippine National Police (PNP) at Philippine Drug Enforcement Agency (PDEA).
“Walang humpay ang ating anti-drug campaign. At hindi tayo titigil hanggang sa maalis natin ang impluwensya ng droga sa ating mga barangay. Sinisira nito hindi lang ang ating komunidad pati na rin ang bawat pamilya at mga kabataan,” pagbibigay-diin ni Mayor Estrada. JOCELYN TABANGCURA-DOMENDEN