POLOMOLOK, South Cotabato- PATAY ang isang kawani ng Department of Public Works and Highway (DPWH) Sarangani Province matapos sumalpok ang minamanehong kotse sa puno ng santol kahapon ng madaling araw, Setyembre 16 sa bayang ito.
Kinilala ang biktimang si Eduardo Hachuela Trinidad Jr. alyas Alog, 33, dating college varsity basket player at residente ng Barangay Poblacion, Alabel, Sarangani Province.
Ayon kay PLt. Col. Peter Pinalgan Jr. Pinalgan, hepe ng Polomolok Police Station, bandang 3:00 AM nang maganap ang insidente sa national highway na sakop ng Barangay 1, Sto. Rosario, Barangay Glamang, Polomolok, South Cotabato.
Lumabas sa pagsisiyasat ng pulisya, minamaneho ng biktima ang kanyang Mitsubishi Mirage plate number MBD 2210 at posibleng nakatulog ito hanggang sa sumalpok sa puno ng santol.
Sa lakas ng bangga, nawasak ang harapang bahagi ng sasakyan at nagtamo ng matinding pinsala sa ulo at katawan ang biktima na naging sanhi ng agaran nitong kamatayan.
Paniniwala ng mga awtoridad maaaring mabilis ang patakbo ng sasakyan ng biktima at nakaidlip ito na naging sanhi ng aksidente. Mary Anne Sapico
The post Kawani ng DPWH patay sa puno ng santol first appeared on Remate Online.
