GUMASTOS umano ang Philippine National Police (PNP) ng tinatayang P130,000 para sa pagpapa-check up ni Janet Lim-Napoles, utak ng P10 billion pork barrel scam.Ang pera ay inubos sa pagrenta ng ultrasound machine na ginamit sa pagsusuri kay Mrs. Napoles. Ang gusto nito noong una ay sa St. Lukes siya ma-check up pero sa halip, sa PNP General Hospital siya dinala noong Miyerkules.
Ilang senador kagaya nina Sens. Antonio Trillanes at Chiz Escudero ang nagsabi na dapat nang mailipat sa karaniwang kulungan kasama ng sari-saring kriminal si Napoles.
Una, bagama’t mahalagang testigo ang ginang sa nasabing scam, hindi naman siya napapakinabangan para maidiin ang mga nakasapakat niya sa pandarambong sa pondong bayan.
Walang masustansiyang ebidensiya at salaysay na ibinibigay si Napoles kung kaya hindi malalagay sa panganib ang kanyang buhay. Ibig sabihin, hindi na siya dapat nakapiit sa Sta. Rosa, Laguna kung saan ang kanyang mga guwardiya ay may hiwalay na allowance sa PNP bukod sa suweldo.
Kung nasa Sta. Rosa, iba pa ang ginagastos ng gobyerno kapag ibinibiyahe siya sa mga pagdinig ukol sa scam. At heto nga, dagdag gastos din ang pagpapa-check up sa kanya sa ospital. Hindi biro ang P130,000 winaldas ng pamahalaan sa check up lang ng isang hindi naman importanteng tao.
Para sa isang Pinoy na hirap makakain ng tatlong beses isang araw at namamatay sa sakit dahil hindi makapagpasuri sa doktor, kasuklam-suklam ang ginagawang ito ng gobyerno.
Para makahingi ng tulong sa gobyerno sa paghingi ng pangpagamot, maghihirap ng ilang araw, linggo at kung minsan ay buwan pa bago maabutan ng kakarampot na barya ang nasabing halaga ay sobrang laki ng tulong para sa maraming mahirap na pamilya sa iskuwater. Tapos ay winawaldas lang ito sa isang taong utak sa bilyon pisong pangungulimbat sa kuwarta ng bayan.
Malaking katarantaduhan talaga. Kaya nga ang sabi ng iba, kaysarap naman magnakaw sa pondo ng bayan.
The post KAY SARAP MAGNAKAW SA PONDO NG BAYAN appeared first on Remate.